声音故事.各家自诉贫穷说
跳往主要内容
开始主要内容

声音故事.各家自诉贫穷说

貧窮說

「贫穷说」主页声音故事数据真相捐款支持扶贫工作


贫穷有话说,你愿意听吗?10月17日是国际灭贫日,我们希望借着这别具意义的日子,唤起公众对贫穷的关注,加入扶贫的行列。乐施会与「StoryTeller说故事」合作,制作4个与贫穷有关的故事,邀请唱作音乐人林家谦、关心社会的叱咤903 DJ急急子、关注气候变化的唱作歌手Manson张进翘,以及声音甜美的女歌手Cloud云浩影,用声音演绎这4个发生在不同地方、不同背景的贫穷故事,希望让公众对「贫穷」有多一份新的理解。
 

#贫穷说 ep1:【清洁工人】
(声音演绎:林家谦)

贫穷说,我不只是饿,也不只是无钱。

贫穷说,我很热,在极端天气下,我比其他人更热。我每天挨著中暑的不适,手停口停,却未能享有适当的劳工保障。

〖声音稿〗

做咗清洁工一段时间,陈伯仲系未习惯喺大热天时开工
 
今日天气好热,新闻话有成36度,系今个月破纪录最热嘅一日
佢著住又唔索汗又唔透气嘅蓝色制服,身水身汗攞住扫把扫完一个街口
再慢慢咁推住架车去下一条街
 
呢几年天气愈嚟愈热
间唔中就有工友顶唔顺中暑,要去睇医生
啲工友成日话,「做耐咗你就惯㗎啦」
讲系咁讲啫,咁热嘅天气,真系好难习惯
 
件衫局促未系最惨,最惨系成日无得饮水
清洁工要补水,就要去垃圾站
但垃圾站净系得热水煲,工友要自己煲水饮
 
大热天时唔想饮滚水嘅话,就要自己带水
所以好多工友都会带住大大枝水出街
辛苦抬住啲水,总好过口渴无水饮吖嘛
 
清洁工系无休息时间嘅,如果想饮水
就要鬼鬼鼠鼠,偷偷摸摸咁行埋一边饮
因为好惊比人见到
 
唔好话食饭啦
试过有工友因为饮水而比市民投诉,搞到好麻烦
陈伯有时都会谂,大家都系人,饮啖水点解都要惊惊青青呢?
 
话咁快佢带出嚟果两枝水已经饮晒
垃圾站又好远,好难返去煲水饮
平时陈伯已经唔敢开冷气
净系开风扇,交电费已经用好多钱
喺街买水饮要比钱,佢真系唔舍得
 
于是,就算佢开始头晕晕,唔太清醒
都只可以同自己讲,顶住先,忍耐下
然后继续攞起扫把扫地
到真系顶唔顺果一刻
陈伯喺一栋旧式大厦嘅门口坐低,谂住抖一阵就无事
 
呢个时候,有位保安行近
陈伯心谂,保安行过嚟一定系想赶佢走
于是佢撑住扫把好辛苦咁爬起身
点知,保安原来攞住一枝水,仲话:
 
「天气咁热,请你饮枝水啦。」
 
好多人都话,香港系个好热嘅地方
但住喺呢度嘅人大部份都好冷酷
 
不过,原来都仲有人系咁温暖嘅
 
佢接咗枝水,饮咗一啖,对住个保安微微一笑
由心咁讲咗一句「多谢」
 
好多人以为,穷就系无饭食无屋住
但其实穷有好多种
穷系可以令你连热都热过其他人
 
陈伯喺心入面谂,如果呢个城市入面
大家都愿意谂多一步,变得宽容啲
更加体谅身边嘅人,你话几好呢?

〖完〗

 

 

#贫穷说 ep2:【保安与蕃茄】 
(声音演绎:急急子)

贫穷说,我有工作,但我只能蜗居㓥房;

我有家,但我无法让孩子吃得有营养。

〖声音稿〗

身为一位保安,见到有闲杂人等坐喺大厦门口
其实系应该赶佢走

不过黄生认得,佢就系平时清洁呢条街嘅清洁工
先至谂起今日天气咁热,佢顶唔顺先会坐一阵
于是黄生走去雪柜,攞咗枝私伙嘅樽装水,走埋去同佢讲:

「天气咁热,请你饮枝水啦。」

疫情开始无耐,黄生就失咗业
本来佢系做厨嘅,一家人住喺屯门嘅㓥房
仲要照顾老婆、仲细嘅囝囝,同埋有长期病嘅细佬

于是佢开始报读唔同课程,例如学做点心,整面包,仲考埋保安牌
揾咗好耐工,卒之真系比佢揾到份保安嚟做

平时一收工,佢都会赶返屋企
不过今日有啲唔同
因为佢要带个仔入深水埗见营养师 

黄生做厨嗰阵,煮嘅嘢个个都赞
唯独是自己个仔净系钟意食蕃茄,其他就乜都唔食
更加从来无赞过爸爸煮嘅嘢好食
而且又瘦又轻,做爸爸嘅当然心痛
后来佢发现,有间社区中心会为基层家庭小朋友做营养咨询
虽然要搭成个钟车去,但都决定带个仔去试下

去到先知,原来好多基层家庭小朋友都有偏食问题
有小朋友净系肯食鸡翼同鸡蛋
仲有小朋友净系食豉油捞饭
又或者家长本身亦都唔识点去配搭出营养均衡嘅菜式
所以小朋友就容易太瘦或者太肥

营养师话,囝囝肯食蕃茄已经唔错
于是建议黄生煮多啲同蕃茄有关嘅菜式
例如用电饭煲就整到嘅蕃茄虾仁炖饭、
想饮碗汤就煲番茄节瓜蛋花肉片汤
势估唔到,一个小小嘅蕃茄可以有咁大嘅威力
依家望到个仔食饭食到清晒碟,黄生真系一天都光晒

好多人以为,穷就系无钱开饭
但其实穷有好多种
穷都可以有饭食,但系无营养

如果小朋友肯食,家长死悭死抵都会将最好嘅嘢留比佢哋
问题系,大部份基层家长都无营养知识
自然唔知点先解决到偏食问题

果一餐,仔仔食晒所有餸之后
终于都讲咗一句黄生等咗好耐嘅说话:

「爸爸,你煮嘅嘢真系好好食啊!」

〖完〗

 

#贫穷说 ep3:【农夫和他的种子银行】 
(声音演绎:Manson 张进翘)

贫穷说,气候变化下,

就算有地种田,多努力都可以一无所有。

〖声音稿〗

何小麦出世喺广西嘅一条小村落,世世代代都靠耕种维生
种豆,种米、种蕃茄,几乎乜嘢都种

近几年天气好热,有时好耐都唔落雨,一落雨就系暴雨
种啲嘢好多时唔系晒干就系俾暴雨打冧,真系好难搞
本来去咗城市打工嘅小麦
决定带住自己喺城市学到嘅销售知识
返乡下做农夫
仲帮条村建立咗「社区种子银行」

以前好多农夫都会各自保留种子,大家自己顾自己咁种
如果某个品种夹唔啱个天气,果年嘅收成就会系零
有咗社区种子银行,唔同农夫、唔同村落之间可以互相交换种子
种多几个品种,提高成功收成嘅机会
一个人嘅力量好有限,结合唔同村落嘅小农,力量就大得多

好多人以为 
穷就系无饭食无屋住 
其实穷有好多种 
在气候变化嘅影响下 
就算有地种田,几努力都可能一无所有 

呢几日,多咗个新面孔嚟揾何小麦学嘢
果个就系陈小姐
陈小姐嚟自香港,本身系一位社工
平时好钟意种嘢,会做假日农夫
佢听到广西呢边有人搞紧种子银行
就专程过嚟揾何小麦取经

小麦好开心,因为佢终于可以同人分享自己搞种子银行嘅经验
佢心入面明白,自己用紧嘅方法喺国内都唔系主流
好多人贪快贪易,钟意用农药化肥同外来嘅商业种子
但咁样其实系对环境唔好
过份依赖农药同化肥
仲会令气候变化嘅情况恶化

陈小姐好钟意食蕃茄,佢咬咗一啖小麦种出嚟嘅蕃茄
哗,真系又甜又多汁
所以决定要带啲蕃茄种子返香港试下种

何小麦望住佢食得好滋味嘅样
想像有香港嘅小朋友食咗呢啲蕃茄之后
好似陈小姐咁,开心到笑咗出嚟

小麦好似突然明白到
虽然一个人嘅力量好微小
但只要你愿意同更多人分享
咁自己所相信嘅事
就有可能散播到更多唔同嘅地方

〖完〗

 

#贫穷说 EP4:【非洲村庄的一部手机】 
(声音演绎:Cloud 云浩影)

贫穷说,我是复杂而多样,还会随社会发展不断变化。
在贫困村落的一部手机,
是贫穷人与资讯连结、改善生活的媒介。

〖声音稿〗

离开咗广西嘅小村落
陈小姐下一个服务地点系非洲嘅坦桑尼亚 
坦桑尼亚系世界上其中一个开发程度最低嘅国家
而陈小姐今次去嘅目的地,系一条离城市好远嘅村落,陈小姐都有晒心理准备
无谂到,条村俾陈小姐嘅第一个印象
竟然系佢哋唔少村民都有手提电话
就咁睇落,难免觉得:「佢哋都唔系好穷啫」
 
再dup 低头睇睇,大家手上面虽然揸住部旧款电话
但唔少人亦只系着住一对好残旧嘅鞋
  
原来对非洲农民嚟讲,手提电话已经系一个重要工具
就算连鞋都冇得着,都希望有一部电话
因为呢个系佢哋接触资讯嘅渠道
尤其系气候变化之下,天气变得无办法预测
非洲农民真系唔可以再好似以前咁
单靠睇下个天就去种田,随时有旱灾、虫灾
所以呢,天气资讯真系好重要
 
透过手提电话,佢哋可以接收天灾嘅资讯,及早防范
咁就可以决定几时落种子、几时收割,增加农作物收成
如果唔系,真系好易血本无归㗎

偏远嘅贫穷农民好难出去市场买卖 
喺资讯唔均等嘅情况下
佢哋通常都系受压迫嘅一方
有啲好贫穷嘅村落,就算得一两个村民有电话
成条村都可以得到重要嘅防灾资讯、同埋农作物价格嘅讯息
从而有机会改善佢地贫困嘅生活
 
以前啲人讲嘅贫穷,通常都系无屋住无饭开果种
但系贫穷会随著社会发展而不断变化
当手提电话变成必须品,一个人就算拎住部手机,
都唔等于佢好有钱
反而无手机,更加同社会隔绝,好难生存
生活更加贫穷

第二朝,其中一位农村妇女攞住部电话行埋嚟
原来佢想加陈小姐嘅 Facebook 做朋友
陈小姐当然好开心咁攞咗部电话出嚟add 佢做 friend 啦
 
返到香港之后,陈小姐间中都会留意吓呢位住喺坦桑尼亚嘅朋友
虽然佢唔系成日更新
但每次睇到坦桑尼亚朋友嘅相,佢都觉得
世界好大,同时亦都好细

〖完〗

 

「贫穷说」主页声音故事数据真相捐款支持扶贫工作