同阿女兩小時的難民體驗

圖 / 文: 冰冰媽媽

喺香港，教育係一種消費，我哋好容易花費左啲金錢，就以為滿足左仔女教育嘅需要，好多時候錢洗咗，但係亦唔見得小朋友從中「學習」了什麼，更遇到好多經驗，以為可以提升佢嘅興趣，相反仲嚇怕左佢學習嘅動機！

我同阿女去了一個很特別的工作坊，是有關「體驗難民」，樂施會工作坊名額好少好快就已經full ！有時候自己有職業病，其實都唔想，但係又忍唔住心中評論一下不同導師帶領方法同設計，今次嘅工作坊，一個咁難令小朋友明白嘅議題，可以點玩呢？而且參加者年紀都有幾年嘅分別，又如何照顧好似我個女比較細小嘅小朋友呢？

細節唔仔細講，但係導師既處理/設計真係非常值得讚賞！由一個簡單的繪本故事開始，一層層帶小朋友進入難民嘅心路歷程，當你要同家人分離的時候，有什麼感覺呢？投入的小朋友有些小眼睛也紅了！阿女説：「我以後都唔再玩呢個遊戲（活動）啦！」（證明非常投入）然後導師又細心地因應小朋友嘅年紀能力，比佢哋擔任唔同難民嘅責任，小朋友又覺得好玩，但係又真係體驗到難民嘅辛酸，最後先至比佢哋睇返呢個世界現實嘅情況，比佢哋知道世界嘅另一面，究竟發生乜嘢事。

小小嘅朋友，我哋未必需要佢完全了解整個世界發生嘅實況同資訊，但係從小可以建立關愛社會嘅概念，世界不是只有自己，但可以由自己開始思考同其他人及社會、世界嘅關係，一點一滴累積世界公民的意識！工作坊小朋友都非常投入、主動思考及積極討論！（當然父母也要一起投入啊！）

活動完結之後，我同阿囡都內心滿滿的！感謝主辦單位同導師！

大家可以到以下連結，暑假活動剛接受報名：樂施會「無窮世界」親子體驗學堂

冰冰媽媽（陳渝英）
一位媽媽，資深兒童藝術教育家丶心理治療師及戲劇導師，曾任香港電台兒童電視節目《點蟲蟲-開開心心學飛》、《小伙子大本營》等節目主持 。